الخميس، سبتمبر 08، 2011

يوميات امرأة من الارياف ((2))



أصحى ياعايده الفجر بيدن قومى صلى عشان تاخدى الفطار وتسرحى لخالك الغيط
انت عارفه انه من امبارح بايت بيروى الارض

حاضر ياستى بس اكمل الحلم واقوم طوالى
يابت قومى حلم ايه بس خالك تعب وعايز يفطر ويقيل ساعه0
واول حاجه اعملها ادور تحت المخده فين الفلوس ياستى اللى كانت هنا ؟؟
فلوس ايه يابنتى
وانا نايمه حلمت انى حطيت فلوس كتير هنا
ههههههه طيب بكره تجيلك فلوس تانى فى الحلم ابقى خلى بالك منه كويس
قومى يلاه
واقوم اتوضى واصلى واخد سرة الاكل اللى حضرتها ستى
وامشى ساعتين وسط الزراعه وحدى الناس كلها لسه نايمه وبتسرح لما النهار يشقشق
وانا مش شايفه قدامى من الضباب كل خطوه على الطريق ياما سمعت عنها حكايات قتل وعفاريت
يالهوى وافضل اقرأ قران وابص حواليا وورايا هو لازم خالى يبات فى الغيط
ابويا وامى واخواتى فى مصر مرتاحين وسيبنى هنا لوحدى بالذمه ده عدل بقى علشان اتعلم لازم اشتغل وانا طفله واتعرض للخوف والشقا والعفاريت اللهم اجعل كلامى خفيف عليهم
طيب العفاريت كبرها هتعمل ايه معايا هخاف من ايه هو انا عيله اها عيله وهبله وكلامنجيه على الفاضى ده لو بس ظهرت ممكن اطب ساكته والتعابين اللى بتاقبلنى كل يوم اكتر من مره
وافضل افكر لحد ما اوصل قابلت كتير وشفت كتير لكن ربنا سترها معايا جايز عشان لسه عيله
خالى الاكل اهو
طيب ياعايده اقعدى يلاه نفطر
حاضر
وبعد الفطار خالى يقولى هغفل شويه خلى بالك الساقيه دايره
حاضر ياغالى
وكل ما البقره او الجاموسه تقف اقول عااااااا تمشى
وكان كل تفكيرى اللى دايما يتكرر هى الجاموسه ما بتتعبش ما بتعتضرطش
يبقى انا اللى هعترض كلنا دايرين فى ساقيه واحده
ويصحى خالى يفك البقره او الجاموسه ويجى وقت فراغنا
الساعه عشره الصبح ولسه بدرى على معاد الغدا والتقيل
عايده جهزى السنارة
حاضر يا خالى
والطعم حاضر
وكنت بخبرتى ومراقبتى لخالى اعلم جيدا اماكن الطعم
ونقعد سوا على شط الترعه وكل منا يرمى بسنارته فى الماء بعد ان يقوم بنفسه بوضع الطعم فيها
صحيح كان خالى دائما الفائز ودى ما كنتش بسميها شطاره بالعكس كنت بقول رزقه واسع
كان يصطاد عشر سمكات مقابل سمكه منى
وخلال ساعتين نحصل على كميه كبيرة من مختلف انواع السمك
وده كان ايام الرى
اما الايام العاديه فكانت المياه فى الترع والمصارف قليله جدا
وكنت احب تلك الايام لاننى لا اضطر للذهاب للارض الفجريه وكنت بسرح ركبه الحمارة وجنبى الكثير من الناس
وكان الصيد فيها سريعا وخيرة وفير
كنت انزل الترعه انا وخالى يعمل سد وانا سد وننطل الميه خارج السد طبعا بادينا
وبخبره نمسك السمك وسط الوحل او اماكن تواجده كنت اعلم جيدا ان السمك يبنى بيوته على جانب الترع او المصارف
ويكون حصيلة ما جمعناه شوال ونعود للمنزل لكى تشوى ستى السمك للغداء وتوزع الباقى على الجيران
وكانت اكلتى المفضله سمك سمك سمك مشوى مقلى صيديه مع برام الرز المعمر
جايز من عشرتى مع السمك اخدت خبره كبيره اعرف انواعه وكيف اصطاده
ولغايه دلوقتى لما اروح السوق اشترى سمك لازم يكون طازة
ولما تكون قراميط بحرص انى امسكها بنفسى المرة الاولى استغرب البائع من جرائتى وضحك وقالى ابقى قابلينى
لو مسكتى قرموط واحد ههههه قلتله تدفع كام تراهن قال بثقه اراهن اذا كان انا بمسكها بشبكه
ووسط دهشة البائع وذهوله مسكت القرموط ببراعه
وكان اول رد ماتيجى تشتغلى معانا
ههههههههه

علمنى الصيد الصبر وعدم الفشل
والاعتماد على النفس
واذاى اواجه خوفى لو قابلنى تعبان وسط الترعه صحيح كنت بخرج بسرعه
وافضل اراقبه لغاية ما يبعد عن المكان وبعدين انزل تانى الحزر مطلوب
وبرغم انى دائما كنت اتمنى ان اكون نباتيه وكنت اعشق انيس منصور لانه نباتى
ولكنى حاولت وفشلت فانا لا اهوى اللحوم منذ الصغر فذات يوم كنت مع ابى فى السوق وفجأة وقفت مزهوله وانا اشاهد جمل يزبح وسألت ابى لماذا يذبحون الجمل اجاب لكى يبيعوه فسالته وهل هناك بشر يأكلون لحم الجمل قال نعم وكانت اجابتى يع ومن يومها هاصمت اللحوم بجميع انواعها حتى ولدت كريم عدت لاكل اللحوم بشراهه ماعدا لحم الجمل وحاليا لا اكل سوى الضانى ولا احب الفراغ ولكنى اعشق البط والوز والحمام وممكن التازل عنهم ولكن السمك مستحيل
فقد تربيت على السمك والذبده والقشطه
واذكر جيدا ان ستى كانت تحلب البائم كل يوم وتحصل على خمس طواجن من اللبن نشرب ما يكفينا وتضع الباقى تحت الدولاب حتى يروب اللبن وتاتى تانى يوم لتفقد الطواجن فتجد ان القشطه قد اختفت وتسألنى عايده فين القشطه وارد اكلتها ياستى بالف هنا وشفا حبيبتى
اقدر اقول ان الاساس كان صح وان زمان كان الخير فى كل مكان
انتظرونى فى يوميات جديده
تحياتى

23 التعليقات:

مدونة رحلة حياه يقول...

السلام عليكم
الله عليك
جميل قوى يا عايدة كملى وسيبنا بقى من التجمل وخلينا فى توبنا البلدى احسن
دوما مبدعة

جايدا العزيزي يقول...

مدونة رحله حياه

وعليك محمد

مرورك هو الاجمل اخى

طبعا البلدى يوكل

اشكرك جدا على تواجدك

تحياتى

ツSmiLeY AnGeLツ يقول...

ياااااه دنتي طلعتي من صغرك جدعة بمية راجل
هههههههههه
حلوه ذكريات الطفولة
حبيتها كأني بتفرج على مسلسل اطفال
مستنيه الجديد

اموت فيك ^_^
تقبلي مروري ^_^

غير معرف يقول...

موضوعك مسلي جدا
ونهايته فتحت نفسي قوي علي اكلت سمك
اصلي اخوكي يموت في السمك المشوي
بس انا صايم النهاردة
نشوف الموضوع ده في يوم تاني

تحية وتقدير

reemaas يقول...

عجبنى اوى اسلوب الكتابه يا عايدة حاسه انى متخيله الكلمات وهى خارجة بنفس الطريقه
ليها نغمة خاصة

كنتى جدعه من صغرك

جايدا العزيزي يقول...

خواطرى مع الحياة

طبعا يارشا هو انت لسه هتعرفينى ياقمر

الجدعنه خلقت من اجلى يابت

انت لسه شفتى حاجه كملى مسلسل الاطفال وهتشوفى هههههههه

وحشتينى ياقلبى

وحمدالله على السلامه

كفايه فيس وخليك هنا ههه

تحياتى

جايدا العزيزي يقول...

محمود عسكر

شكرا اخى اهو بحاول اتسلى معاكم بزكريات حلوة

اختك كمان مدمنه سمك ههههههه

انت كده اللى فتحت نفسى لازم تفكرنى يعنى

عموما ابقى افتكرنى وانت بتاكل السمك

اشكرك جدا على تواجدك الدائم اخى

تحياتى

حَنيّـن نِضال يقول...

الاحداث سلسة و مشوقة خطتها يد مبدعة بحرفية متمكنه و بارعة

في انتظار البقية ^_^

جايدا العزيزي يقول...

reemaas
عارفه نور انا فكرت اختار الاسلوب الشائع

ولكنى تراجعت وقررت ان اكتب على طبيعتى وعلى الرسائل مباشر

فما يخرج من القلب يصل للقلب بسهوله

وما فيش اجمل من البساطه

اشكرك حبيبتى على الاهتمام الدائم

فلتواجدك رونق خاص

تحياتى

جايدا العزيزي يقول...

haneen nidal
بل تواجدك هو الاروع غاليتى

كم يسعدنى تواجدك وحروفك النديه بين سطورى

اشكرك جدا واشكر روحك المرحه التى تثنى على قلمى

دمت مبدعه

تحياتى

سواح في ملك اللــــــــــــــــــه- يقول...

الله عله الذكريات الجميلة

تعرفي مع كل التحضر والامكانيات اللي احنا

عايشينها دي لكن الواحد امنية حياته

انه يعيش عيشة فيها الهواء النقي والخضرة

والناس الجمال الطيبين

الزحمة ياجايدا بتقتلنا ببطء

رائعة ذكرياتك متابعينك

كملي

جايدا العزيزي يقول...

سواح فى ملك اللـــه

فعلا هى ذكريات جميله

برغم انها كانت وقتها متعبه لطفله

اكيد اتفق معك انا دائما احن للناس الطيبين والخضرة والهواء النقى وازور بلدى دائما

بالتاكيد الزحمه ارهقت نفوسنا وعقولناوقلوبنا ايضا

الاروع مرورك اخى

سعيده بمتابعتك الدائمه

حاضر ساحاول

تحياتى

Unknown يقول...

السلام عليكم ورحمة الله وبركاته
حقاً كانت أيام خير وسعادة ومرح وسرور
نشكرلك سيدتى هذه اللحظات الجميلة والتى سمحت لنا أن نشاركك فيها ذكرياتك الطيبة.
تقديرى واحترامى
وبارك الله فيك وأعزك

أحمد زاهر يقول...

حلوة قوى حكايات زمان دى
الكلام زمان كان طعمه مختلف
طوالى , يقيل

شمس النهار يقول...

سرد جميل ياجايدا

ممتعة جدا
:))

غير معرف يقول...

جميلة اليوميات لون جديد عليكي يا جايدا و مميزه دائماً كما إعتدناكي .
تحياتي و كل الود لكي

شيرين سامي

عبد الرؤوف بن عبدالسلام (أبوهارون) يقول...

يا مدونين يا عرب عندنا توفيق الحكيم لالالالا .جايدا الحكيم لالالالا . جايدا المبدعة...
الله عليك ما احلى الطبيعة والريف
رؤوف

غير معرف يقول...

صباحك غاردينيا جايدا
ورحلة جديدة مع ذكريات تلك الريفية البسيطة التي تسكنكِ رائعة أنت ِ بكل تفاصيل كم أستمتعت والأجمل شعرت بـ الأحداث وكأنها أمامي "
؛؛
؛
لروحك عبق الغاردينيا
كانت هنا
reemaas

sabry abo-omar يقول...

جميل أسلوبك والروح الحلوة والفطرة النقية فى الموضوع.. مستنين منك باقى اليوميات دى علشان نستمتع بيها معاكى.. تقبلى مرورى وإعجابى بكلماتك

Miss LoZa يقول...

بابا هو الى كان بيعمل زى عايدة كده
وياكل كل القشطة تحت السرير
هههههههههههه
بوست كميل :)

غير معرف يقول...

عايدة ......
لأول مرة أعرف إنك ريفية جدا ........ وجدعة جدا وقشطة جدا جدا ماهوه إنتى متربية عليها
فكرتينى بتجاربى وحكاياتى التى حكيت بعضها وعلقتى على بوست منها شكرا لكى كلمات صادقة معبرة بسيطة رائعة

غير معرف يقول...

عايدا.........
بالتعليق عندك لاأستطيع أن أعلق إلآ إنى أكون ( نكرة ) يعنى غير معرف كازلت مصمم على قشظة .........
المهندس / فاروق سحير (الشاعر / فاروق بن النيل )

Emtiaz Zourob يقول...

جميلة .. " حلم الجعان عيش "

في انتظار المذكرات القادمة ..

أضف تعليق

تصميم وتطوير - مدونة الاحرار - 2011.