الاثنين، نوفمبر 08، 2010

يارايحين للنبى الغالى هنيالكم.......... وعقبالى


يا ريحين لنبى  الغالى هنيلكم   ......و(عقبالى )

ااخوانى واخواتى المدونين

انا مش جيه اكتب ااقول ان الحج ركن من اركان الاسلام
السنه الماضيه والدتى رجعت من العمرة
كانها طفله بريئه لم تولد الا منذ ساعات
وفضلت تحكى لينا بكل حب قد ايه سعيده
وانها كانت فى نور وشعرت ان جميع اجزائها محاطه بهالات من النور

احساس قد ايه جميل ومهما وصفت ما اقدرش اوصفه
وكانت مجرد عمرة
طب احساس الحج ايه

ممكن الى حج يدخل يوصف ايه كان احساسه وقتها

وهو واقف اما بيت الله الحرام

وايه احساسك وانت بتشاهد الكعبه المشرفه

وهل شهدت كساء الكعبه المشرفه الجديد وهما بيحطو

انا شفته مرتين فى قنوات السعوديه بس اكيد فى الحقيقه ليه احساس تانى

ومين نفسه يحج وهتدعى فى بيت الله الحرام تقول ايه وانت
واقف على عرفات هتدعى تقولى ايه


الله .. الله .. الله . الله

يا رايحين للنبي الغالي .. هنيالكم وعقبالي


يا رايحين للنبي الغالي .. هنيالكم وعقبالي

الله .. الله .. الله . الله

يا ريتني كنت وياكم .. واروح للهدي وازوره

وابوس من شوقي شباكه .. وقلبي يتملي بنوره

واحج واطوف سبع مرات .. واللبي واشوف منى وعرفات

واقول ربي كتبهالي .. يا رايحين للنبي الغالي

الله .. الله .. الله . الله

امانه الفاتحه يا مسافر لـ مكه .. تأدي فرض الله

حترجع والاله غافر ذنوبك .. لما نلت رضاه

يا ريتني معاك في بيت الله .. وازور وياك حبيب الله

هنيالك وعقبالي .. يا رايحين للنبي الغالي

الله .. الله .. الله . الله

شوف بيت الله الحرام
بتمنى اهديكم يا حجاج بيت الله الحرام

اجمل الورود

حج مبرور وذنب مغفور


34 التعليقات:

الأزهرى يقول...

يا رب اشتقنا فاكتبها لنا

وعدنا الله تعالى بها وإياكم

وكل سنة والجميع بخير وسلام

eng_semsem يقول...

ربنا يكتبها لينا ولجميع المسلمين ويتقبلها من كل اللي حجوا واللي لسه هيحجوا

سواح في ملك اللــــــــــــــــــه- يقول...

(مكه وفيها جبال النور** طله علي البيت المعمور دخلناباب السلام غمر قلوبنا** السلام وعدل رب غفور)ربنا ياجايدا يكتبهالك باذن الله

mrmr يقول...

صباح الخير يا اجمل جايدى
ربنا يناولهالك يارب انتى وكل الغالين
ويجعلها حجه مباركه باذن الله على كل الحجاج

ذئب الظلام يقول...

صباح الخير
احساس جميل ورائع الحج والوقف بين يدي الله عز وجل
اتمنى من الله ان يرزق الحج في اقرب فرصة ممكنة

الــحــــنـــــــــــــــــــين يقول...

يارب اكتب لينا الحج وكل خير وابعدن عن الاحزان اللهم امين

Unknown يقول...

يا رب يرزقك بالحج و ايانا عن قريب ان شاء الله أنا حجيت مره بس كنت صغيره و عايزه أقولك ان الحرم هو أجمل و أطيب و أطهر مكان على الأرض و مهما وصفت مش هعرف أوصفلك احساسك لما تشوفي الكعبه و لما تبقي جزء من الطواف
شكرا يا جايدا على البوست الجميل

Carmen يقول...

ربنا يكتبهالنا يارب
انا كنت هطلع كذا مرة عمرة بس ماكانش في نصيب للاسف :(
ربنا يكتبهالنا جميعا اللهم امين

ツSmiLeY AnGeLツ يقول...

عمري واختي وصحابتي وحبيبتي جايدا
ربنا يكتبها عليك وعلينا يارب
وسامحيني
كلمات جميلة عجبتني جدا
يارب ناقبل النبي
يارب
تقبلي مروري
سلامي لاحلى وارق واجمل واطيب اخت ليا.

Noha Saleh يقول...

ياااااااااااااه انا نفسى فعلا احج
او اعمل عمرة
اكيد احساس تانى وكفاية ان اللى بيرجع من هناك ربنا بيغفر له ذنوبه
ياريت ربنا ينولهالنا كلنا يارب

عمرو يسرى يقول...

يارب يكتبها لينا ولجميع المسلمين

موناليزا يقول...

يارب يكتبها لكل مشتاق

وكل عام وانتِ بخير

Tears يقول...

كل سنة و الجميع بخير و صحة

Ramy يقول...

ربنا يديكى

و يجعل لك فيها نصيب

كل سنة و أنتِ بخير

(:

سندباد يقول...

كل سنة وانتي والامة الاسلامية بخير وربنا يكتب لينا زياره بيته المحرم وقبر الرسول عليه الصلاة والسلام
بارك الله فيكي
وعله في ميزان حسناتك
تحياتي

MaNoO يقول...

للاسف لسه متحققتش بس يااااااارب اوعدنا جميعا وكل اللى بيتمنوا اوعدنا بروح صافيه واحساس بالحياه النقيه فى الاماكن الطاهره يارب ما تحرم مسلم منها

اقدم عاصمه فى الحب يقول...

ربنا يكتبهالك ويكتبهالى
ويكتبها لكل اللى بيتمناها

ليلى الصباحى.. lolocat يقول...

كل سنة وانت طيبة وكل الاسرة بخير وسعادة اختى الحبيبة

بالنسبة للحج بابا حج اكتر من 6 مرات وماما 2
انا بقى اموت واحج بس حالتى الصحية مش تسمح الان لله الحمد

اللى انا عرفاه ان الحج شفاء من كل داء
وفيه قول ان اللى يشعر ان الفقر قتله او المرض فى بدنه يحج بيت الله ويغتسل من زمزم والله اعلم

أسأل الله القدير ان يكتبنا عنده من حجاج بيت الله

اشكرك غاليتى على المساحة التى اتحتيها لنا هنا (للفضفضة) بما نحب وما فيش احمل من قضاء حق الله بالحج

كل سنة وانت سعيدة ورقيقة ورائعة
سلامى لكل اسرتك وتهنئة ارق بالايام الطيبة هذه

محمد التركى يقول...

السلامو عليكم

جودى كل سنه وانتى طيبه يارب
وربنا يبارك ليا فى الايام المفترجه وفى الشهر المفترج

طبعا هقولك سامحينى غبت وكده خلاص بقى انتى اتعودتى على غيابى
المهم انى رجعت

أمى والله عاشت احساس العمره السنه دى
وجت عايشه برضو فى هالات النور وكل لما تشوف الحرم والكعبه على القنوات الدينيه الدموع تفر من عنيها وتنادينا وتقول ربنا يارب ينولهلكم ويبارك ليكم وتدعلنا انا واخواتى لاننا كنا عملنلها العمره هديه عيد الام
وربنا يقدرنا ونخليها تحج وتدعلنا برضو

أنا شخصيآ نفسى احج
نفسى ازور قبر الرسول وابكى واستغفر وادعى وابكى واغسل كل زنوبى
نفسى والله
يارب نولهالى
يارب ازور بيتك الحرام وقبر أشرف خلق الله قبل مماتى

ربنا قادر على كل شئ

كل سنه وانتى طيبه ياجودى وربنا يارب ينولهالك وتزورى قبر رسوله معتمره وحاجه بأذن الرحمن
بس تدعيلى اوعى تنسى

كل سنه وانتى طيبه انتى واسرتك الكريمه

تحياتى لقلبك الطيب

محمـــد التركـــى

الحسينى يقول...

أنا حجيت مرة واحدة وعاوز أقولك أن الوقوف أمام الكعبة أول مرة بتحسى معاه كأنك فعلا مش واقفه على الأرض وعينك مش مستوعبة أو مش قادرة تجمع تفاصيل الكعبة والحجاج اللى بيطوفو حواليها غير الصفاء النفسى الرهيب اللى هناك مشاعر مهما كتبت مش هاقدر أوصفهاربنا يرزقنا جميعاً الحج وزيارة بيته مرات عديدة وأعوام مديدة ويتقبل منا جميعاً أمين

تــركــي الــغــامــدي يقول...

موضوع رائع كروعة من طرحه ... قطعاً لايمكن وصف تلك اللحظات الروحانية وبخاصة عندما يرتقي المسلم في خشوعه وانكساره أمام خالقه العظيم ... إنها مشاعر تختلط فيها الراحة النفسية بالدموع ... أكرمنا الله بتلك اللحظات الفريدة أعواماً عديدة وأزمنة مديدة .

noora يقول...

انا اديت فريضة الحج السنه الماضيه وكانت من احسن سنين الحج بشهادة كل الجهات المعنية بالحجاج وبشهادة الحجاج
وصراحة انا السنه هذي كل ما قرب موعد الحج احس بحزززن واتمنى اعيد التجربه كل سنه ..
ان شاء الله انتي السنه الجاية بأذن الله ياجايدا
وكل عام وانتي بخير

رحاب صالح يقول...

يااااااااااااة يا جايدا
يارب يكتب لينا كلنا الحج والعمرة ان شاء الله اللهم آميييييين
انا لو ربنا كتب لي حج او عمرة هدعي لكل اللي بحبهم وهدعي لكل شخص اعرفه وهدعي لكل شخص أذاني ولكل شخص معرفوش ولكل مريض ولك محتاج وان ربنا يفرج عن امة الاسلام كل هذا البلاء المحاط بها .....ياااااه دعوات كتيرة لكن مقدرسشا ابوح بيها لأن دعوتي امانه واحب ان الامانه توصل من غير ما يحس بيها اي حد بس يارب اكتبهالي ويكتبهالنا كلنا

كلمات من نور يقول...

ربي يكتبهالنا جميعا صحبة يا جيداااااااا

أجمل إحساس حقيقي إنك تشوفي بيت الله الحرام لاول مرة

رهبة وهيبة وحب لله والقلب يغرد لبيك اللهم لبيك لبيك وسعديك والخير في يديك

يارب اكتبهالي قريبا يارب

أبو فارس يقول...
أزال أحد مشرفي المدونة هذا التعليق.
حسن يقول...

ربنا يكتبهالك ويكتبهالى زوجتى الحبيبه

ونروح عند النبى الغالى يارب

حسن الشيخ

زوجك الحبيب

فاروق سحير ( فاروق بن النيل ) يقول...

جايدا العزيزة.......
إحساس لايوصف عندما ترين الكعبة لأول مرة تجدى نفسك مندفعة دون وعى لاتشعرين بمن حولك وكأنك وحدك تنادى رب العالمين وكأنك الوحيدة الذى يسمعك الله وتلبى فيسمعك ويقبلك وتدعين بدعاء واحد فى تلك اللحظة اللهم إنى أحمل ذنوبا كثيرة لاقبل لى بحملها فإحملها عنى وإغفرى هذه الذنوب وإمحوها يارب وستجدين القبول على شكل دموع غزيرة تنزل منكى دون وعى تلمسيها وتحسى بها. ثم بعد فترة لاأدرى ساعة دقائق تستيقظين من الذهول وتبدأى تحسى بمن حولك وتبدأى تتكلمين معهم وتعودى إنسانة عادية فتدعين بماشئتى لحبابك وأقاربك وأهلك .
بوست جه فى وقته تماما يامبدعة.

Unknown يقول...

ومن منا لايتمنى أن يكون من زوار البيت الحرام؟
نسأل الله تعالى أن يكتبها لنا أجمعين
اللهم آمين

باحث عن حب يقول...

الله يا جايدا
يارب
يكتبهالك
يارب
انتى والزوج والاولاد يارب
يارب
وتزورى حضره النبى صلى الله عليه وسلم وشهداء احد والبقيع
وتطوفى بالكعبه وعرفات ياااااااه
عقبالك يارب
عقبالك

عباس ابن فرناس يقول...

اكيد احساس لايوصف لدرجة انى لاحظت ان فيه ناس كتير الحج عندهم ادمان وده طبعا من حقهم ويمكنده هو الدمان الوحيد المستحب
ربنا يكتبهالنا جميعا يارب
تحياتى

الشاعر الفنان أحمد فتحى فؤاد يقول...

أختى جايدا

أنا و الحمد لله حجيت بيت الله الحرام عام 2005

و مش ممكن تتصورى اللحظة اللى بتشوفى فيها الكعبة .. قد إيه بتتنفضى من جواكى بحب و نشوة أبدا ما تحسيها فى أى إحساس غير ده

الحمد لله رب العالمين

ربنا يكتبها لنا تانى و يكتب ها لكل الناس و يا رب يتقبل منا جميعا

أمين يا رب العالمين

غير معرف يقول...

ربنا يكتبها لنا يارب
اجمعين
كل سنة وانتى طييه يا جودى
عقبالك
اسفه على التاخير
انا عارفه انى دايما متأخرة
وعارفه ان قلبك طيوب مش هتزعلى منى

تحياتى

Mona يقول...

جايدا أدعوكى لقراءة البوست عن العمرة التى قمت بأدائها وربنا يرزقنا جميعا بالحج إن شاءالله

تحياتى
http://mona-myownroom.blogspot.com/2010/08/blog-post_18.html

مرام يقول...

شعور جميل جدا و لا يوصف

و يارب يا كريم يكتبها لك اختي العزيزه

أضف تعليق

تصميم وتطوير - مدونة الاحرار - 2011.