الخميس، سبتمبر 30، 2010

انا بحبك يامصر بس بشكل جديد

انا بحبك يامصر

منذ سنوات كنت دائما ارددها لاننى اعشق ترابها

واغلى شعب عندى شعبها ولسه بحبها

لكن لما فهمت ايه هو معنى الحب اكتشفت انى ما كنتش بحبها

لانى كنت بدفن راسى فى الرمل زى النعامه

شايفه قمرها ونيلها وسماها لكن مش شايفه الظلم اللى بيحصل لشعبها

كنت بردد انه السبب فىالفساد واللى وصله من قهر وجوع وعذاب

لكن اكتشفت انه كان مغلوب على امرة وهيعمل ايه ولا ايه ولاايه


يثور يعتصم يشجب يرفض ولا يجرى على لقمة عيشه علشان يقدر يربى العيال


ومن هنا ذادت عليها وكترت الحمال


واتسع الظلم والفساد اللى يهد الجبال

عينى عليك يا شعبى محروم من العيش

وانت اغنى الاغنياء ولولا النهب لصرت ميت فل وعال

ولسه بحبك يا مصر وغنيلك حلوه بلادى السمرة بلاد الثورة بلاد الخضرة


بس فين الخضرة الخضرة عايزة ميه والميه مش موجودة


سامحينى يابلادى


لان حبى ليك ما كنش كفايه

سامحنى لانى اتهمتك بالظلم واتارى كنت ظلماك معايا


شوفوا معايا ايه اللى بيحصل لمصر وشعبها

شعب بيقوى ويظلم اخوة وراعى نام فى خير وسلام

وسابنا للجوع والفقر وحزرنا لو اعترضنا او حتى اشتكينا

قانون الطؤارى موجود او تدوس الجزم فوق رقابنا

ياعذابك يامصر وعذابنا


الكليب ده من مدونة انا بحبك يا مصر

انا بشكر كل من قام على انشأه

وعلشان كلنا بنحبها لازم نفهمها صح ونحس بعذاب شعبها

عندى كلام كتير وكليبات لمواضيع كتير

كلها بتقول بالف اسم ولون انا بحبك يامصر

انتظرونى

تحياتى






video



37 التعليقات:

رشا يقول...

السلام علسكم
هقول ايه غير ان
ربنا على الظالم
يمهل ولايهمل
هو كده حال مصر والعرب كل واحد بيكره التاني
مفيش اخوة مفيش حب
مفيش حد هيقول لا دا ابن بلدي مش همد ايدي عليه.
يارب صبرنا على الدنيا دي.
سلامي

شهرزاد يقول...

حبيبتي جايدا انت اتكلمت مش بلسان مصري انت تكلمت بلسان عربي
دا مش حال مصر لوحدها دا حال الامة العربية كلنا انخدعنا كلنا مات الحب فبنا وانقتلت الوطنية فينا
حزنك من حزننا احساسك بالظلم من احساسك الارض طيبة وفيها خير كثير بس الايادي كثيرة التي بتنهب وتفسد ودمر هي الارض حتتحمل قد ايه مصيرها تتوجع وتصرخ من الالم وتطرح الي في بطنها جذعان يحموها ويردوا الحب ليه
مع كل الود

الشاعر الفنان أحمد فتحى فؤاد يقول...

جايدا

بكل أسف الكليب بيعبر عن الفساد الطاغى اللى مالى البلد

شوفى أنا مقيم فى دولة عربية - و الحمد لله - من مده طويلة .. و عمرى ماشفت مشهد واحد من المشاهد اللى بالكليب دى
و لا فساد و لا رشاوى و لا ظلم و لا تعسف
و الدولة بتضرب بيد من حديد على مرتكب أى من تلك الشرور

و الله على ما أقول شهيد يا أختى العزيزة

ربنا يرحمنا ... و حسبى الله و نعم الوكيل

دمتى بخير

Noha Saleh يقول...

انا ماكملتوش بصراحة
اصلى الصور دى موجودة فى كل حتة وبزعل لما بشوفها
اخرهم كان خالد سعيد
البلد مش وحشة
بس فى ناس بتستغل سلطاتها كتير

جايدا العزيزي يقول...

رشا

عندك حق ياقلبى

فى كل كلمه

اشكرك

تحياتى

جايدا العزيزي يقول...

شهر زاد

عارفه دايما اردد كلمات معينه

جايز لانها حقيقه وجايز لانى حساها وبحبها

ماتت قلوب الناس ماتت بنا النخوة

جايز نسينا بيوم ان العرب اخوة

احنا نسينا اننا المصرين اخوة

تحياتى

جايدا العزيزي يقول...

الشاعر الفنان احمد فتحى فؤاد

اكيد عارفه ان الكليب بيعبر عن الفساد والظلم

والقهر والخوف والجوع والفقر......الى اخرة

وهو ده سبب نشرى ليه

لان لازم اعترف بسلبياتنا علشان اقدر احصى ايجابيتنا

للاسف اتغيرنا للاسوء

وطبعا اؤئيدك اخى احمد

انا اعلم بما يدور فى الدول العربيه

وبما يسودها من امن ورخاء

وخصوصا دول الخليج لان زوجى ظل فى الامارات

5سنوات يكفى انهم يمنحوك حق مجهودك

ويعاملوك باحترام وحب لانك مصرى

العالم العربى يحترم مصر ونحن لا

لقد حكى زوجى عنكل ذلك ولكن قال ان المصريين

كانوا يتنافسوا لكى يكون كل انسان افضل من الاخر


والسؤال هنا هل الوم المصريين لا

بل اسخط والوم كل من ساعد الى ان يصلوا لهذا المستوى من الذل والاستسلام الذى ادى بدورة

الى التخلف وموت القلوب زالضمائر والبحث

باى طريقه كانت مشروعه اوغير مشروعه

عن لقمه العيش

انا هنا لا الومهم انا الوم حكومه ظالمه فاسدة

ادت الى انهيار مجدنا وانستنا تاريخنا

اشكرك اخى الفاضل

تحياتى

جايدا العزيزي يقول...

Noha Saleh

لازم نشوف الصور لاننا لازم نفوق

طالت غفوتنا لازم نغضب ونثور

وهى دى اهميه الاعلام

طبعا مصر ام الدنيا

وانا بتكلم هنا عن كل من سولت له نفسه ان يسرق

قوت الشعب الغلبان

وعلى كل من تؤدى سلطته الى ان يدوس بحذائه

على رقاب العباد

السنا مسلمين

السنا مسحين ومسلمين مصريين

تحياتى

noora يقول...

شعاري انا احب وطني مهما فعل به المواطنين
وطني مابيظلمني ولابيقسى علي لكن من ادعى الوطنية هم من يسيئون للشعوب

محمود(باحث عن حب) يقول...

كلنا بنحب مصر
مفيش اطيب من شعبها
يارب
يرحم شعب مصر
من فرعون
القرن

جوجو يقول...

السلام عليكم
مهما حصل منقدرش ننكر حبنا ليها
لان العيب مش فيها العيب فينا احنا
تحياتى

جايدا العزيزي يقول...

نورا

انا لا اختلف معك مطلقا

فانا احب وطنى بكل الظروف

تحياتى

جايدا العزيزي يقول...

اخ محمود

طبعا كلنا بنحبها

لان كما زكرت مافيش اكرم ولا اطيب من شعبها

تحياتى

جايدا العزيزي يقول...

جوجو

طبعنا ياقلبى

حبهاسكن قلوبنا

وزى ما قلتى العيب فينا مش فيها

وهو ده كان قصدى

تحياتى

Mohamed يقول...

يا ريت الخلل في نظام واحد يمكن كان لقينا حل جذري وسريع لكن السوس نخر جميع الانظمة فكيف السبيل للحل بعد ذلك ؟

هذه هي طباع الحاكم العربي والمثل بقول الله لا يحكم عربي في عربي ... لانو العربي لما يحكم عربي بهالزمن يا ويله ويا سواد ليله محنا عايشين وشايفين.

الشعوب مكلومة ومش قادرة ولو قدرت بيحطوها ورا الشمس ...

بعين الله


يعطيكي العافية جايدا موضوعك في الصميم.

Tears يقول...

الانتماء هو ان البلد تدينى فأنا اديها مش العكس زى كلام الاغانى...يعنى الطفل بيحب أمه لانها قامت برعايته و احتضانه و حمايته و بالتالى صار له ولاء لها لكن لو كانت يوم ما خلفته فتحت باب الشقه و رمته على السلم و لا انتظرت لما كبر و ذلته و اهانته و انتهكت آدميته ما كانش ح يبص فى وشها بعد كده

جايدا العزيزي يقول...

Mohamed

سعيده حقا بتواجدك اخى

وكم اسعدنى حوارك لانه خلاصه للموضوع

بس حلوة كتير منك ورا الشمس

كان نفس اقولها ودى انت قولتها

اشكرك

تحياتى

جايدا العزيزي يقول...

تريز

لاول مرة اختلف معك فى وجهات النظر

الانتماء هو انتمائى لدينى ووطنى واسرتى

احبهما دون مقابل

اما مسألة العطاء امر نسبى

ولو فكرتى ستجدى

ان الوطن وهو مصر مثلا اعطانا

الجنسيه حين ولدنا اعطانا البيت والاسرة

اعطانا الكثير والكثير

وهنا انا لا اناقش انتمائنا لمصر

فهو موجود فى داخل اعماق كل منا

مع اختلاف النسبه

انا هنا اتكلم عن شعب يهان ضعيف

يسلب وينهب ويداس بالاقدام

من اخ له العيب فينا غاليتى

وليس فى مصر

تحياتى

mrmr يقول...

على قد حبنا لمصر
على قد كرهنا للظلم اللى بيقع علينا
ربنا يرحمنا ونعيش فى امن وامان ذى زماااااااااااان

جايدا العزيزي يقول...

جى ليه متاخرة

اعمل ايه وياكى يا جميل

عارفه كنت فى الشغل

ربنا معاكى

ويستجيب منك ومننا

تحياتى

Ahmed Mustafa - zema يقول...

اتفق معك تمام الاتفاق في ما رصدته من مشاكل تمر بها مصر
و فعلا انا اعيش حالة من الاكتئاب و الحزن لما يحدث
حتى وصلت الا انني لم يعد لي رغبة في العيش هنا
حتى و ان كنت املك سبل العيش الكريم
لكن لا استطيع ان اتعايش مع كل هذا الفساد
فساد حكومي طاغي و فساد شعبي ايضا
فاين هي الشهامة و المرؤة
و اين الواجب و الصداقه
اين الكرم و المؤاثرة
لم يعد غير النفاق و الفساد و الرشوة و الكذب و الرياء
لم يعد ينظر لاي قيمة مادية او معنوية غير قيمة المال
لم يعد هناك قيمة للعمل فاصبح كل ما يعمل هراء

لا اجد بد من الاطاله اكثر من هذا
فان كلنا نعرف ما وصلنا اليه
بفضل الحكومات المتتاليه الفاسده
و بفضل ابتعادنا عن الله
فاحل بنا عذاب متمثل في قهر نراه ولا نقدر ان نغير من الامر شيئا

لك و لنا الله يا مصر
و اخرجنا منها سالمين يا رب العالمين

دمت بخير اختي

السُـلطانة يقول...

السلام عليكم ورحمة الله وبركاته ..

ومين ما يحبش تراب مصر ونيل مصر وعبق مصر التاريخي الخالد .. سلمت الأنامل.

Tears يقول...

جايدا العزيزة

معلش انا ح ارد عليكي بشكل عملى

الوطن لم يعطينى اى شىء و انت ذكرتى مثالين بس لان صعب تلاقى غيرهم بس انا ح ثبتلك انهم مش صح برضة و بمنتهى العملية لاننا مصريين زى بعض فمش معقول ح قولك كلام دعائى و لا للاستهلاك الاعلامى لانك عارفه و شايفة بنفسك

البيت لم يعطيه ليه الوطن زى ما قلتى بل هو تعب و شقا اهلى اللى الدولة دى حاربتهم عشان تخلى فسادها يرتع و قانونها الويكة كان بيمشى على ناس ناس

عندك فى الشارع اكتر من مليون طفل مشرد ده غير المسنيين و المراهقين...فين البيت اللى الوطن اداهلهم؟

تعليمى لم يصرف فيه الوطن قرش

مع ان اصلا ده حق المواطن مش حسنة و لا صدقة من حد عشان نقال اعطانى كذا

الجنسية؟....شوفى طوابير المصريين على السفارات و بيدوخوا ازاى عشان ياخدوا جنسية تانية لان بلدهم رمياهم و بتعاملهما اسوأ معاملة جوه و لا تسأل فيهم بره

انا يا بنتى لفيت البلاد و شفت الباسبور المصرى ده مهان قد ايه و ازاى الفلبينى بره سفارته بتهتم و تساعده و ازاى المصرى سفارته بتحاربه...و ياريت تراجعى ورق القضية اللى رفعها اهل المصرى المقتول فى الكويت حرقا من اسبوع ضد السفارة المصرية و وزارة الخارجية و ياريت تقابلى المصريين فى لبيا او السعودية و تسمعى العجب

جايدا...الوطن زى الام...لو بادرتى انك اولا لان الام بانك تحب ولادك ح يحبوكى و يدوكى عينيهم عشان فضلك عليهم و حسن معاملتك تمر فيهم لكن لو سرقتيهم و عذبتيهم و اهانتيهم و كرستى كل جهودك لمص دمهم و خلتيهم مروعين و كل همه يتفادوا بطشك و ظلمك و فسادك ما ح يصدقوا يهربوا منك حتى لو رموا نفسهم فى الميه و غرقوا على حدود ايطالية اللى كانوا رايحينها من غير فيزا عشان يغسلوا اطباق

اللى خرب الوطن الفساد و السلبية...الشعب ده جبان و يستاهل اللى هوه فيه

انا بقول كده مش وانا قاعده فى التكييف مع ان ده حقى و بشقاى و تعبى و تعليمى لكن بالرغم من كده انا ايدى بايد اللى بيحاول يغيير فى مظاهرات و اعتصامات و حاجات تانية ما ينفعش تتقال هنا...صدقينى حاولت بس لما تحتكى بالناس تحسى انهم يستاهلوا و مش ح انكر انى غيرت كتير من خططى و قناعاتى و حتى تصرفاتى و بقيت مقتنعه ان مافيش فايدة

و ده مش عشان الفساد و زنا السلطة و المال اللى حاصل و محمى بالأمن لكن عشان الشعب ميت و راجعى التاريخ او اقرى كتاب كفاح شعب مصر و انتى تشوفى قد ايه المصرى بيتهان و يتذل من ايام الفراعنه و ازاى دايما محكوم بالحديد و النار و كل هبات الحماس بتنتهى و بيستعذبوا الخنوع و الذل

اقرى ده لان دى كلمات استاذ جامعى مصرى و شخصية مثقفة جدا

http://tears-demo3.blogspot.com/2010/02/blog-post_22.html

بجد اسفه على الاطالة جايدا

Haytham Alsayes يقول...

والله ياجايدا
ربنا يستر علي البلد

انا مش عارف اعلق غير كدة

تحياتي ليكي

فتاه من الصعيد يقول...

الكلام حقيقي مع الاسف

وكلنا كنا بندفن راسنا في الرمال

ويا ريت البلد تتحسن لما نعي اللي حوالينا من ظلام وظلم

مدونه جميله .... وزياره سأكررها أكيد

إسمحيلي أضيف مدونتك

تحياتي

محمد التركى يقول...

السلامو عليكم

جايدا

مصر أه يامصر
بحبك ولو حتى مت من الجوع
بحبك وياستى كلامك مسموع
اللحمه نار
الطماطم خيار
مش مهم بحبك يامصر
بحبك ونفسى تحبينى مره
وقانون الطوارئ يمشى من بره بره
واللى كاتم على نفسنا يسافر مره
وطيرته تولع ونشم نفسنا مره
ساعتها بس هتحسى يامصر قد ايه بحبك
وهتقوليلى يامصر بحبك ياشعبى
واقولك
بحبك يامصر

معلش بقى الكلام مش ماشى مع بعضه شويه
والله جه فى بالى دلوقتى قولت اكتبه وخلاص
بس الفديو جميل مع ان الصور متكرره وقديمه
بس الفكره مع الاغيه حلوة

ربنا يسترها علينا

تحياتى لشخصك الطيب

محمـــد التركـــى

حرّة من البلاد..! يقول...

كلنا نحب أوطاننا ,
أسأل الله أن يرفع عنا الظلم .
وترجع بلادنا أفضل وأحسن
دمت عزيزتي .

كلمات من نور يقول...

الوطن رمز احنا استهونا بيه لما فصلنا الوطن الإسلامي وخليناها الوطن الرعبي ولما بقى فينا حمية الجاهلية القديمة .مصري يشتم ليبي .جزائري يشتم مصري وهكذا نجحوا في سياسة : فرق تسد ....محتاجين نفوق بقى قبل ما ربنا يستبدلنا ....يارب غيرنا ولا تستبدلنا

جايدا العزيزي يقول...

Ahmed Mustafa - zema

اخى الفاضل

اتمنى من الله ان يبعد عنك الهم والحزن

فقط لا تنظر الى نصف الكوب الفارغ

انت محق صار العيش فى وطننا مستحيلا


ولكن الذل والهوان فى نظرى

ارحم من الغربه

ولكل شئ ضريبه

اشكرك على تواصلك

ولك تحياتى

جايدا العزيزي يقول...

السلطانه

طبعا بنحبها

مهما شوفنا فيه علشان عيونها نستحمل

اشكرك

تحياتى

جايدا العزيزي يقول...

تريز

جايدا العزيزة

معلش انا ح ارد عليكي بشكل عملى

الوطن لم يعطينى اى شىء و انت ذكرتى مثالين بس لان صعب تلاقى غيرهم بس انا ح ثبتلك انهم مش صح برضة و بمنتهى العملية لاننا مصريين زى بعض فمش معقول ح قولك كلام دعائى و لا للاستهلاك الاعلامى لانك عارفه و شايفة بنفسك

اختى انا اعلم كل شئ ولا اتجمل ولا اسعى للكلام الداعى

وكما قلت ارفض ان ندفن رؤسنا فى الرمال

البيت لم يعطيه ليه الوطن زى ما قلتى بل هو تعب و شقا اهلى اللى الدولة دى حاربتهم عشان تخلى فسادها يرتع و قانونها الويكة كان بيمشى على ناس ناس

غاليتى تذكرى انا هنا لا اناقش الانتماء

انا اناقش الفساد والظلم من فئه سمح لها مركزها ان تدوس باقدامها على فئه ضعيفه لا حول لها ولا قوة

اما الانتماء فتتفاوت النسب فيها

عندك فى الشارع اكتر من مليون طفل مشرد ده غير المسنيين و المراهقين...فين البيت اللى الوطن اداهلهم؟

تريز فى امريكا اكبر الدول واغناها

الاف المشردين والفقراء وان كنتى لا ترى منها سوى الاحياء الراقيه

ستجدى فى الاحياء الفقيرة من يسكنون الشوارع

ومن يسرقون لكى يسدوا جوعهم

اين البيت التى منحتهم اياه امريكا وطنهم

تلك ليس قاعدة

تعليمى لم يصرف فيه الوطن قرش

تريز اطفالى جميعا يدرسون فى مدارس حكوميه

لا ادفع سوى قليل من الجنيهات نظير الكتب

لا انكر انى ادفع الكثير نظير الدروس الخصوصيه

ولكننى لست مرغمه على ذلك

لا انكر ان النقود بتمشى المراكب السايرة

ولكن اذكرى دوله عربيه او غير التعليم فيها مجانا

انا ابنى تعب وصرفت عليه الوفات فى المستشفيات الخاصه ولم ياتى العلاج باى نتيجه

وفؤجئت بالمسؤله عن وزارة التامين الصحى تستدعينى

وتسألنى لماذا لم تلجئى الينا

واجبت بصدق .......هناك الاف غيرى يحتاجون بشدة

للتامين اكثر منى

وايضا لانى اشك انهم سيعتنون بابنى العنايه الازمه

وحقا ورب السماء

قاموا معى بكل ما يمكن

الجلسات التى كنت ادفع فيه الوف كانت على نفقتهم

عنايه ومتابعه وادويه على نفقه التامين

حقا لم يقصروا

مع ان اصلا ده حق المواطن مش حسنة و لا صدقة من حد عشان نقال اعطانى كذا

....... لا احد فى مصر يعمل لا يأخذ اجرة

حقا انه لا يكفيه ولكنه يحصل عليه سواء

فى القطاع الخاص او الحكومى

الجنسية؟....شوفى طوابير المصريين على السفارات و بيدوخوا ازاى عشان ياخدوا جنسية تانية لان بلدهم رمياهم و بتعاملهما اسوأ معاملة جوه و لا تسأل فيهم بره

من وجهه نظرى من يطلب جنسيه ثانيه لايستحق ان يكون مصرى

وملحوظه انا لا اتكلم عن البلد

انا اتكلم عن حكومه فاسدة ظالمه اذا تغيرت

انتهت مشاكلنا العيب مش فى البلد ولا فينا

العيب فى الحكومه ودى وجهه نظرى
هكمل فى تعليق تانى

لان الرد مش راضى ينزل

جايدا العزيزي يقول...

تريز نكمل



انا يا بنتى لفيت البلاد و شفت الباسبور المصرى ده مهان قد ايه و ازاى الفلبينى بره سفارته بتهتم و تساعده و ازاى المصرى سفارته بتحاربه...و ياريت تراجعى ورق القضية اللى رفعها اهل المصرى المقتول فى الكويت حرقا من اسبوع ضد السفارة المصرية و وزارة الخارجية و ياريت تقابلى المصريين فى لبيا او السعودية و تسمعى العجب

هو ده مربط الفرس الحكومه والمسئولين

هما اللى وصلونا لكده مش مصر هناك فرق

جايدا...الوطن زى الام...لو بادرتى انك اولا لان الام بانك تحب ولادك ح يحبوكى و يدوكى عينيهم عشان فضلك عليهم و حسن معاملتك تمر فيهم لكن لو سرقتيهم و عذبتيهم و اهانتيهم و كرستى كل جهودك لمص دمهم و خلتيهم مروعين و كل همه يتفادوا بطشك و ظلمك و فسادك ما ح يصدقوا يهربوا منك حتى لو رموا نفسهم فى الميه و غرقوا على حدود ايطالية اللى كانوا رايحينها من غير فيزا عشان يغسلوا اطباق

حبيبتى تريز

الام هنا بشبها بمصر

مصر عمرها ماتخلت عنا بالعكس هى الوطن

هى الحضن انتى بنفسك قولتى لو سفرنا اى بلد تانيه بيحصل ايه لينا

لكن هنا بين اهلنا وناسنا لو تعبنا هنلاقى الكل حوالينا

صدقينى العيب مش فى مصر العيب فى حكومتها

اللى خرب الوطن الفساد و السلبية...الشعب ده جبان و يستاهل اللى هوه فيه

كنت كتير بقول زيك زمان لكن قوليلى بايده يعمل ايه

يشتغل علشان يربى العيال ولاه يثور ويرفض ويتظاهر

وفى الاخر عيالوا هتجوع وهيتشردوا

وهينداس عليه بالنعال ويمكن يروح ورا الشمس

لازم ندرس الموقف ولازم للعواقب نحسب

ولازم نعرف امته نثور وامته نكون ايد واحدة وللفساد نرفض

من قراتى لكتب التاريخ الثورة مش حل

عبد الناصر لما ثار كان ليه اطماع هو وظباطه الاحرار واللى خطط للثورة اتنفى وبعد سنوات اختفى واتنسى ((محمد نجيب)) فكراه
انا بقول كده مش وانا قاعده فى التكييف مع ان ده حقى و بشقاى و تعبى و تعليمى لكن بالرغم من كده انا ايدى بايد اللى بيحاول يغيير فى مظاهرات و اعتصامات و حاجات تانية ما ينفعش تتقال

والنتيجه كانت ايه هل اتغير شئ

من اسوء لاسوء

اقولك نتيجه المظاهرات شويه فى السجون وشويه فى المعتقلات

والباقى تحت التهديد يمشى ويخاف

وتنزل بعض العلوات واستجابه لابسط الطلبات

ونبلع البرشامه اللى تسكنا ايام ونام

ونصحى نلاقى الحال عاد لما كان عليه

باقى تانى ايه وايه ذنب مصر

وليه نظلمها معانا

هنا...صدقينى حاولت بس لما تحتكى بالناس تحسى انهم يستاهلوا و مش ح انكر انى غيرت كتير من خططى و قناعاتى و حتى تصرفاتى و بقيت مقتنعه ان مافيش فايدة

لما بشوف الناس دى ببكى واقول لو ان فى نفس الوضع هعمل ايه وليه القسوة من حكومتنا ليه

مافيش فايده من الحكومه مش من مصر ولا الشعب

و ده مش عشان الفساد و زنا السلطة و المال اللى حاصل و محمى بالأمن لكن عشان الشعب ميت و راجعى التاريخ او اقرى كتاب كفاح شعب مصر و انتى تشوفى قد ايه المصرى بيتهان و يتذل من ايام الفراعنه و ازاى دايما محكوم بالحديد و النار و كل هبات الحماس بتنتهى و بيستعذبوا الخنوع و الذل


انا قارئه جيدة للتاريخ غاليتى واعلم ان الشعب

المصرى كما ذكرتى يذل ويهان ولكن من حكوماته

وليس من بلده ولكنك لم تذكرى مجده وفتوحاته

لقد ذكر الله مصر مرات فى كتابه الكريم

اذهبى لاى بلد وابحثى عن الامن والامان وقارنى بينها وبين وطننا مصر

اننا هنا امنين لا يغدر بنا الا حكومتنا

اتمنى ان تكون وجهه نظرى وصلتك

والاختلاف فى وجهات النظر لا يفسد للود قضيه

لاننى احترم رائيك وسعيدة بحوارك

فكم اشتقت للحوار الهادف البناء
اقرى ده لان دى كلمات استاذ جامعى مصرى و شخصية مثقفة جدا

http://tears-demo3.blogspot.com/2010/02/blog-post_22.html

بجد اسفه على الاطالة جايدا

لقد قمت بالقراة وسعيدة لانها اضافت الى كثيرا

ولكننى مازلت عند وجهه نظرى

اشكرك تريز ولا تحرمينى من حوارك

حقا سعيدة بك جدا

فكم اتوق لانسان يحاور حوار بناء

حتى لو كنت مخطئه ساعترف على الفور بخطئ

لان الاعتراف بالحق فضيله

ارجو الا تحرمينى من حوارك

تحياتى

جايدا العزيزي يقول...

Haytham Alsayes

يسمع منك ربنا ولدعواتك يستجيب

نورت المدونه

تحياتى

جايدا العزيزي يقول...

فتاه من الصعيد

يارب يتقبل منك يا قلبى

ومرورك هو الاجمل غالينى

وطبعا ضيفى براحتك

اشكرك على التواصل

انتظرك

تحياتى

جايدا العزيزي يقول...

محمد التركى

عطرت همساتك ارجاء المدونه

كلمات جميله راقتنى

لا داعى لترتيب الكلمات دعها تخرج كما هى

لانى افعل ذلك

فكلامات ان بحبك يامصر

كتبتها على الرسائل مباشرا

اهلا بك نورت المتابعين

وتقبل الله منك ومنا

تحياتى

جايدا العزيزي يقول...

حرّة من البلاد..!

طبعا يا قلبى كلنا نحب اوطاننا ونتمنى لها الافضل

اللهم وفقنا لما هو فيه خير لبلادنا

تحياتى

جايدا العزيزي يقول...

كلمات من نور

عندك حق لما مصرى يدوس على اخوة

وعربى يشتم اخوه فى العروبه

نسينا اننا اخوه

اللهم تقبل منك

وانا ادعوا معك اللهم غيرنا ولا تستبدلنا

نورتى يا ست الكل

وربنا يخليلك حسام ويحيى ويوسف

تحياتى

أضف تعليق

تصميم وتطوير - مدونة الاحرار - 2011.